ЯҢАЛЫКЛАР

9 ноябрьдә аучылар Казансу елгасы буйлап әлегә китәргә өлгермәгән үрдәкләрне куып йөри. Бер аучы атып та җибәрә, әмма ядрәләр үрдәккә түгел, ә иптәшенә эләгә. Хәсрәт аучы бу көнне үрдәк түгел, ә яралы иптәшен алып кайта. Анысы хәзерге вакытта Арча хас- таханәсендә ята.

— Мылтык — уенчык түгел, аның белән сак эш итәргә кирәк, — ди районара аучылык инспекторы Илһам Галимҗанов. — Моннан соң без дә таләпләрне көчәйтәчәкбез.

“Мира–Бэлла” этник халык инструментлары беренче республика фестивалендә Арча балалар сәнгать мәктәбенең “Мирас” гармунчылар ансамбле (җитәкчесе З.Гайфуллина) беренче дәрәҗә лауреат исеменә лаек булды. 

Тверь өлкәсенең Конаково шәһәрендә Бөек Ватан сугышы герое В.В. Васильковский истәлегенә бокс буенча 13нче Бөтенроссия турниры узган. Анда Россиянең 30 шәһәр, өлкә, республикасыннан килгән 222 спортчы катнашкан. Алар арасында “Арча” балалар–яшүсмерләр спорт мәктәбендә тәрбияләнүче (тренеры Марат Галиев) Илнур Хәлиуллин да булган. Үз үлчәү категориясендә ул беренче урынны алган һәм Россия спорт мастеры кандидаты нормативын үтәгән.

Көрәштә безнең егетләр бирешми

Биектауда 13 тапкыр Татарстан Республикасы, 8 тапкыр Россия чемпионы булган Данил Галиев истәлегенә үткәрелгән спорт көрәше буенча ачык турнирда 12 команда катнашкан. Анда Арча педагогика көллиятеннән Инсаф Корбангалиев һәм Түбән Мәтәскә мәктәбеннән Фәнгиз Мәннапов – беренче, педагогика көллиятеннән Динар Гайнетдинов – икенче, Нәсим Габидуллин өченче урыннарны яулаган. Безнең җыелма команда өченче урында. 

Кичке якта бер таныш аучы шалтыратты. — Әле генә урамда төлке аттым, — ди бу. — Бер хуҗалыкның ишегалдына кереп тавыклар куып йөри дигәч барган идем. Капкадан башта тавыклар очып чыкты, артларыннан төлке, аның артыннан себерке тоткан хуҗа хатын. Төлкене атып ектым, капчыкка салып чүплеккә ташлагыз, дидем...

Мин бу хәлне район ветеринария берләшмәсе җитәкчесе Ринат Фәйзрахмановка сөйләдем.

— Төлкене юк итүләре әйбәт булган, — диде ул. — Чөнки “дөрес” җәнлек алай йөрми, алар бик сак була. Ә менә чүплеккә ташлаулары бик начар, хәзер аны эзләп алырга туры киләчәк. Быел китерелгән һәр төлке өчен 300 сум акча да түләнә бит әле.

— Шул турыда тулырак аңлатып китсәгез иде.

Псков өлкәсендә барган бәрелешләрдә һәлак булган сугышчы Шәрифулла Кәлимуллинның эзтабарлар табып алган шәхси әйберләре Носыда яшәүче бердәнбер туганы Наилә Әхмәтҗановага тапшырылды.  Носы мәктәбендә үткән әлеге дулкынландыргыч очрашуда республика хәрби комиссариатының Арча һәм Әтнә районнары буенча бүлек җитәкчесе, подполковник Алмаз Борһанов катнашты. “Районда солдат гәүдәләрен табып туганнарына тапшыру вакыйгасы дүртенче очрак инде, – дип сөйләде хәрби комиссар. – Бу бик зур сан”.

Очрашуны укытучы Ландыш Фәйзрахманова “Солдатлар” җыры белән башлап җибәрде. Тыныч кына йомшак итеп җырлаган тавыш, йөрәкләрне айкап, елыйсын китерде...

Июнь аенда язып чыккач, мин вак-төяк сатучы әбиләрне гел күзәтеп йөрдем. Яңа урам базары эченә керерләрме, капкасы янында гына булса да сату итәрләрме, әллә үзләренә берәр уңайлы урын әзерләп бирерләрме, дип көттем.

Арча үзәгенә чыксаң, сагыз, йон оекбаш, бияләй һәм башка шундый кирәк-яракны сатучы әбиләрне күрәсең. Элеккеге урам базары ябылгач, аларның төрлесе төрле якка сибелде, сату итү өчен кеше күп йөри торган урыннарны сайларга тырыштылар. Шәһәр Советы аларга “Эссен” кибете янындагы мәйданда сатарга рөхсәт бирде. Аларны тегеннән дә моннан да кудылар, 1әр мең сум штраф салып карадылар, әмма әбиләр “Эссен” янына сату итәргә бармады. Элеккеге урам базарын сагындылар, чөнки алар базар эченә тезелешеп утырып сату иттеләр. Урыннары җайлы иде. 

Балаларын армия сафларына озаткан аналарның күңел кичерешләрен күз алдына китерүе авыр түгел. Назлап кына үстергән сабыеңны ел буена күрмим, дигән сүз бит ул. Шунысына сөенергә кирәк, тыныч заманда хезмәт итә балаларыбыз. Бүген алар турында ата–аналар гына түгел, җитәкчеләр дә кайгырта.

– Һәр хәрби часть белән даими элемтәгә кереп, егетләребезнең хәлләрен белеп торабыз, алар турында хатлар яздырып алабыз. Телекүперләр аша аралашу да үз нәтиҗәсен бирә. Ә менә үзебезнең район шефлык күрсәткән Саратов өлкәсенең Шиханы шәһәрендә урнашкан хәрби частьта хезмәт иткән егетләребез белән дүртенче ел инде яннарына ук барып очрашабыз, – ди Татарстан Респуб- ликасы хәрби комиссариатының Арча һәм Әтнә районнары буенча бүлек җитәкчесе Алмаз Борһанов.

Авылларыбызның киләчәген уйлап борчылмаган кеше аздыр. Аларны саклап калу өчен бүген нәрсә эшләп була? Бу сорауны районыбыз җитәкчесе Илшат Нуриев төрле очрашуларда еш бирә.

4 ноябрьдә ул югары уку йортларын тәмамлап районыбызда эшләүче яшь белгечләр белән очрашты.

— Без бүген сезнең уй фикерләрегезне, тәкъдимнәрегезне ишетергә телибез, — диде ул. — Эш дәверендә сезгә нинди проблемалар белән очрашырга туры килде? Шулар турында үзегездән ишетәсе килә.

Татарстан Респуб- ликасы Авыл хуҗалыгы һәм азык–төлек министрлыгы өченче ел рәттән “Һөнәре буенча иң яхшы” конкурсында җиңүчеләрне билгеләде.

Конкурс йомгаклары буенча Арча агросәнәгать көллияте укытучысы Илнар Гыйниятов “Иң яхшы инженер–механик” исеменә лаек булды.

Илнар — Югары Пошалым авылыннан.

- Министр Марат Әхмәтов белән аралашу, аның кулыннан бүләк алу онытылмаслык вакыйга булды, — ди ул. — Без укыткан яшьләр арасында авылда калучылар аз түгел, мин үзем дә авылны яратам.