ЯҢАЛЫКЛАР

“Бердәм Россия” сәяси партиясенең җирле бүлекчәсе “Геройлар урамнары” проекты нигезендә игелекле эш башкара. Проектның максаты – геройларны искә алу, алар белән халыкны таныштыру, ватанпәрвәрлек рухында яшьләрне тәрбияләү. Арча станциясендәге яңа 9нчы балалар бакчасында (“Шатлык”) әти-әниләр, балалар белән үткәрелгән истәлекле урам бәйрәме шуның ачык мисалы.
Арча станциясендә мәчеттән өстәрәк Марат Лотфуллин урамы бар. Кем ул Марат Лотфуллин? Ни өчен урамны аның исеме белән атаганнар? Белгәннәр, Әфганстан сугышында һәлак булган егет, диләр. Очрашуга әнисе Илсөя апа да килгән иде. Аз сүзле ана улы турында әллә ни сөйли алмады.

Борһанов Тимерхан Борһан улы 1925 елның 11 июлендә Минзәлә кантонының, хәзерге Мөслим районы, Вәрәшбаш авылында туган, әнисе Бибигатифә аңа 11 яшь чакта вафат була. Әтисе Борһан кабат өйләнә, ләкин ул үги әнисе дә озын гомерле булмый, Тимерханга тагын бер үги әни белән яшәргә насыйп була.
Тимерхан кечкенәдән тырышып укый, кичләрен сукыр лампа яктысында Тукайның ятимлеге турында елый-елый укып утырулар, сукыр музыкантларның бәхетсез язмышларын җиңеп чыгуларын белү Тимерханның китек күңеленә дәва булып, җанында өмет уты кабыза торган була. Ничек кенә авыр булмасын, ул җиденче сыйныфны “5” ле билгеләренә тәмамлый, мактау кәгазе алып чыга. “Борһан малае булдыра!” – диләр авылда.

Әле кайчан гына Гөлира ханым икесен дә чәчәк кебек киендереп очрашуга килә иде. Сөбханалла, үзе чибәр, балалары матур, дип сокланып карый идек без аларга. Мәрхәмәтлек үзәгендә кабат очраштык.
Гаилә һәм балаларга социаль ярдәм бүлеге белгечләре балаларны тәрбиягә алган әти-әниләр, опекуннар, балигъ булмаганнар белән түгәрәк өстәл оештырды. Әлеге чарада район мәгариф идарәсе җитәкчесе урынбасары Миләүшә Шакирова, педиатр Алия Камаева катнашты. Миләүшә Ниязовна балаларның җәйге лагерьлары турында сөйләде.

Фәймә апа безне йорт уртасында аягүрә басып каршы алды. Социаль яклау бүлеге хезмәткәрләре, авыл җирлеге башлыгы, “Арча” телерадиокомпаниясе журналистлары килеп кергәч, йорт эче тараеп калган сыман булды. Ә Фәймә апа шулкадәр кеше килүенә, киресенчә, куанды гына.
Гомере буе авырыксынмыйча кеше көйләп яшәгән шул ул. “Авылга эшкә килгән яшь белгечләр, бәрәңге алган чорда колхозга булышырга килгән студентлар Фәймә апада фатирда тора иде. Кырыс, таләпчән булса да, беркайчан бер–берсеннән зарланышканнары булмады”, — ди авыл җирлеге башлыгы Рәмзия Вафина. Үзендә фатирда торганннарның ничә еллардан соң да онытмыйча, хәлен белеп торулары өчен бик рәхмәтле Фәймә апа. Хәлил исемле агроном егет елга ике тапкыр кайтып китә, ди ул.

50 еллык тарихы булган Арча балалар сәнгать мәктәбенең даны еракларга таралган, дисәм, ялгышмамдыр. Чөнки анда белем алучылар районара, республика гына түгел, Россиякүләм, хәтта халыкара бәйгеләрдә дә катнашып, җиңүләр яулый. Тәмамлап чыкканнар Татарстанның эстрада сәхнәсенә күтәрелә, танылган биючеләр, җырчылар, гармунчылар булып китә. Сәнгать мәктәбе укучылары чыгышыннан башка районда бер генә чара да үтми. “Ар–и–Эль”, “Глянец” бию төркемнәрен, “Энҗеләр”, “Гүзәлкәй” вокаль коллективларын, курайчылар, “Мирас” гармунчылар, баянчылар, “Балкашык” кашыкчылар, гитарачылар ансамбльләрен, тынлы оркестрны, хорны кем генә белми икән. Алар сәнгать мәктәбенең горурлыгы.

Гаризалар 25 августка кадәр кабул ителә. Моның өчен Галактионов урамы, 26нчы йортта урнашкан сәнгать мәктәбенә килергә кирәк. Гаризаны өйдән чыкмыйча гына электрон вариантта мәктәп сайтына да (edu.tatar.ru) җибәрергә мөмкин.
Гөлсинә Зәкиева

Торак-коммуналь хезмәтләргә субсидияләр, 16 яшькә кадәр айлык пособиеләр, мәктәпкәчә белем учреждениеләре өчен компенсация билгеләтү өчен сез Татарстан Республикасы дәүләт хезмәтләре порталы аша (uslugi.tatarstan.ru) рәсми сайтында электрон рәвештә гариза бирә аласыз.
Сорауларыгыз булса, 3–13–30, 3–13–34 телефоннары аша шалтыратыгыз.

Арчада берәү мылтыктан атылып үлгән, дип “аһ!” итә халык. Бу имеш-мимеш кенә түгел, булган хәл. Югары Курсада яшәгән бер ир-ат мылтыктан атылып үлгән. Декабрьдә 55 яшь туласы булган. Гаиләле кеше. Югары белемле. Тумышы белән Казаннан. Гаиләдә бер генә бала булган. Әтисен җирләгәнгә дә әле озак ара үтмәгән. Авылда яшисем килә, дип Казаннан Югары Курсага кайтып төпләнгән. Заманында колхозда баш инженер булып эшләгән кеше. Хәзер өйдә. Күпләп терлек, кош-корт асрыйлар. Көтүгә генә дә 10лап сыер, таналары йөри. Йорт-җирләре авылда бер дигән. Куанып-сөенеп яшисе генә дә бит! Көтү кайткач, күршеләре нишләп малларын кертмиләр икән дип өйләренә керсәләр, ир инде атылган булган...

3 августта ЮХИДИ бүлекчәсе территориясендә (Арча шәһәре, Астроном урамы, 15 А йорт) хатын–кыз автомобиль йөртүчеләр арасында “Автоледи – 2015” конкурсы үткәрелә.
Конкурста районда яшәүче, “В” категориясе, шәхси машинасы булган барлык хатын–кызлар катнаша ала. Белшмәләр өчен телефоннар: 3–22–02, 3–33–39. Конкурс 9 сәгатьтә башлана.
Тулырак мәгълүматлар безнең arskmedia.com сайтында.

Чабышкы атлар турында хәбәрләр килеп тора: җиңеп кайтканнар икән... 1нче һәм 2нче урыннардан төшмәгән Арчада яшәүче Рамил Рәхмәтуллинның хәлләрен белештек.
– Мамадыш районы Җөри авылында Питрау бәйрәмендә ат ярышында 1нче, 2нче урыннарны алып кайттык, – дип сөйләде ул. – Балтач районы Биктәш авылындагы Питрауда үз төркемемдә чапканда 1нче урынны алдым, соңыннан финалда 2нче урынга лаек булдым. Алда әле ярышлар тагын бар.
Арчадан Салават Бикбаев та үз атында тирә-якта җиңүләр яулап, бүләкләрне алып тора. Әле менә Балтачтан бераз кәефе төшеп кайтты, бер генә әйләнә чабасы булган, ә ул ике әйләнә дип ялгышкан, икенче әйләнәдә куармын дип, башта атын тыебрак барган. Нәтиҗә 5нче булган. Егетләргә уңышлар телибез!