ЯҢАЛЫКЛАР
Арча районы прокуратурасы Түбән Мәтәскә, Ашытбаш, Иске Ашыт, Казанбаш, Лесхоз, Яңа Кенәр, Шурабаш авылларында урнашкан мәдәният объектларында террорчылыкка каршы законнарның үтәлешен тикшерде. Аларда 2017 елның 11 февралендәге 176 номерлы РФ Хөкүмәте карары белән расланган мәдәният өлкәсе объектларының (территорияләр) террорчылыктан саклануга карата таләпләрнең 23 нче пунктын бозу ачыкланды: автомат янгын сигнализациясе бөтенләй юк яки ул төзек түгел. Моннан тыш, Яңа Кенәр һәм Лесхоз мәдәният йортларында террорчылык янавы туган очракта башкарылырга тиешле эш-гамәлләр турында мәгълүмат тупланган күргәзмә әсбаплар юк.
Ташландык дачаларны рәсмиләштерү мәсьәләләре буенча туры эфир
Иртәгә, 12 августта 17.45 сәгатьтә Россия 24 телеканалында туры эфирда «Дача темасы», аерым алганда, ташландык дачага законлы рәвештә хуҗа булу мөмкинлеге турында әңгәмә оештырылачак.
Телевидение тамашачылары сорауларына Татарстан Росреестры һәм кадастр палатасы экспертлары Энҗе Мөхәммәтгалиева һәм Ләйсән Рәхмәтуллина җавап бирәчәк.
Туры эфир телефоны 8(843) 554 31 21. Шалтыратыгыз һәм сораулар бирегез.
Җәйге айлар безгә витаминнар, микроэлементларга һәм башка файдалы матдәләргә бай булган бик күп җиләк-җимеш һәм яшелчә бүләк итә.
Бөтендөнья сәламәтлек саклау оешмасы тәкъдимнәре буенча, йөрәк, яман шеш авыруларын, диабет һәм симерүне профилактикалау өчен көнгә яңа яки пешерелгән (бәрәңге һәм шундый ук крахмаллы тамырлардан тыш) 400 гр җиләк-җимеш һәм яшелчә ашарга кирәк.
Соңгы вакытта социаль түләүләр өлкәсендә мошенниклык очраклары ешайды. Социаль түләүләр өлкәсе киңәйтелә, түләүләр суммасы арта, алар белән бергә - кулга чиста булмаган гражданнарның кызыксынуы да арта.
Россия Федерациясе Җинаять кодексының 159.2 статьясы түләүләр алганда, ягъни пособиеләр, компенсацияләр, субсидияләр һәм башка социаль түләүләр алганда акча яки башка мөлкәт урлаган өчен җаваплылыкны регламентлый.
«Коррупциягә каршы көрәш турында» 2008 елның 25 декабрендәге 273-ФЗ номерлы Федераль законның 13.3 статьясы нигезендә оешма коррупцияне кисәтү буенча чаралар эшләргә һәм үтәргә тиеш.
Закон чыгаручы тарафыннан шундый чараларның якынча исемлеге билгеләнгән: коррупциячел һәм башка хокук бозуларны профилактикалау өчен җаваплы бүлекчәләр яисә вазыйфаи затларны билгеләү, оешманың хокук саклау органнары белән хезмәттәшлеге, оешманың эшчәнлеген законнар нигезендә башкару буенча стандартлар, оешма хезмәткәрләренең этика һәм хезмәт тәртибе кодексын кабул итү, мәнфәгатьләр каршылыгын булдырмау һәм җайга салу, рәсми булмаган хисап төзү һәм ялган документлар куллануга каршы юнәлдерелгән процедуралар эшләү һәм гамәлгә кертү.
5 августка район хуҗалыкларында игеннәрнең 54 процентка якыны (31144 гектар) суктырып алынды. Әлегә бер гектардан уртача уңыш – 16,4 центнер.
“Казанка” хуҗалыгыннан соң “Курса МТСы” ширкәте дә игеннәрне урып-җыюны төгәлләде. Уртача уңыш – 20,4 центнер. “Северный”, “Кишет”, “Кырлай”, “Тукай” ширкәтләрендә дә шул чама чыга.
Көннәр коры торгач ашлыкны киптереп артык чыгымнар тотасы юк, дымлылык 12 процентка кадәр калган, туры амбарларга салып та була. Әмма быел тулы кыйммәтле орлыклар салу проблемасы бар. “Һәр елны орлыкларның күчмә фондын булдыру турында сөйләшәбез, әмма бик тыңлап бетермиләр”, – ди Россия авыл хуҗалыгы үзәге бүлеге җитәкчесе Рүзәл Мортазин.
Арча элеваторы җитәкчесе Ләйсән Әһлиуллина хезмәт алдынгыларына бүләкләр алып кырларга чыга.
Бу юлы ул “Северный” ширкәте комбайнчысы Рәдиф Низамовка, “Тукай” ширкәтеннән Рәдиф Сәфәровка, “Яңарыш” ширкәтеннән Фәнил Гыйлаҗевка, “Ташкичү”дән Наил Сафинга, “Ашытбаш”тан Мәгъсүм Шәфигуллинга Рәхмәт хатлары, акчалата премияләр тапшырды.
“Агроснаб” ширкәте район хуҗалыкларын запас частьлар белән тәэмин итүгә зур өлеш кертә. Кыр эшләре чорында ял көннәрсез эшлиләр.
Бер газета укучыбыз: “Иске Масра авылында дүрт баланы берүзе тәрбияләүче ата бар. Аларның йорты бик начар, кыш көне өшеп үлмәсләрме икән?” – дип шалтыратты.
Иске Масрага без социаль яклау идарәсе җитәкчесе Миләүшә Шакирова, Гаиләләргә һәм балаларга ярдәм бүлеге мөдире Нурсөя Дәүләтшина белән бардык. Икесе дә бу гаиләне яхшы беләләр, мөмкин булган ярдәмне күрсәтеп торалар. Шукуржонны бары тик әйбәт яктан гына тасвирладылар. Районда андый гаиләләр арасында үрнәк булып тора, диделәр.
“Ак барс” агрокомплексы” ширкәте җитәкчесе Шәйдулла Сәлахов: “Шукуржон терлекләр барында фермада эшләде, тәртипле кеше, балалары бик итагатьле, очрашкан саен матур итеп исәнләшеп узалар. Мөрәҗәгать иткәндә ярдәм итми калган юк”, – диде.
Ниһаять, “Арск-информ” мәгълүмат үзәге “Бәллүр каләм”ле булды. “Арча хәбәрләре” газетасы редакциясе хәбәрчесе Гөлсинә Зәкиеваны зур җиңүе белән котлыйбыз.
30 июльдә “ТАТМЕДИА” бинасы янында зур чара узды – журналистика һәм масса-медиа өлкәсендәге XXIVнче “Бәллүр каләм – 2021” рес-публика бәйгесе лауреатларын бүләкләделәр.
Бирегә республика шәһәр һәм район редакцияләре җитәкчеләре һәм хезмәткәрләре, шулай ук “Бәллүр каләм – 2021” бәйгесе номинантлары чакырылган иде.
Бәйгегә төрле номинацияләр буенча барлыгы 1823 эш килгән булган. Икенче турга үткән номинантлар арасыннан да иң-иңнәре сайлап алынган. “Һөнәре буенча иң яхшы” номинациясендә җиңү яулаган ике кешенең берсе безнең редакция журналисты Гөлсинә Зәкиева.
Якшәмбе көнне Арчаның Чишмә урамында янгын булды, берәүләрнең сарайлары, икенчеләренең сарай, мунчалары янып бетте.
Башына төшкән кеше өчен бик куркыныч әйбер. Карак бер әйбереңне алып чыкса, янгын барын да көлгә әйләндерә. Бер-беренә бик якын торган йортлар. Ярый әле җиле икенче якка исә. Югыйсә...
– 1 август көнне кичке алтыда Чишмә урамында яшәүчеләр мунча януы турында хәбәр итте. Янгын сүндерүчеләр килгәндә ике сарай һәм бер мунчаны тулысынча ут чорнап алган иде инде. 3 метр ераклыкта гына урнашкан йортка ут кабу куркынычы да бар иде. Янгын сүндерүчеләр янгынны тиз арада сүндерә алдылар, – диде Арча янгын күзәтчелеге бүлеге җитәкчесе урынбасары Раил Гыйльмуллин.