ЯҢАЛЫКЛАР

2015 елның 10-12 августында Казан (Идел буе) федераль университетының Алабуга институтында VI Халыкара укытучылар фестивале була. Фестивальдә Россия Федерациясе һәм Татарстан Республикасының әйдәп баручы укытучылары, урта һәм һөнәри белем бирү системасы вәкилләре, гомуми белем бирү учрежденияләре белән актив хезмәттәшлек итүче галимнәр һәм чит ил белгечләре катнашачак.
Халыкара фестивальдә катнашучылар өчен кызыклы мастер-класслар, түгәрәк өстәлләр, тренинглар һәм педагогикадагы алдынгы тәҗрибәләр презентациясе, һөнәри һәм бәхәс мәйданчыклары үткәреләчәк.
Фестиваль турында тулырак мәгълүмат биредә: http://kpfu.ru/elabuga/proecty-instituta/festival-shkolnyh-uchitelej/festival-shkolnyh-uchitelej-znachimoe-sobytie-v.html

«IT-чемпион-2015» респибликакүләм бәйгесенең беренче этабы 15 марттар 31 июльгә кадәр дәвам итте.
Бәйгенең беренче этабында 39 304 укуты катнашты, алар Тр дәүләт хезмәтләр Порталы белән 46 692 татарстанлыны өйрәткән.
Бәйгенең икенче этабы 1 августтан 30 ноябрьгә кадәр дәвам итәчәк. Бәйгенең икенче этабына баллар өстәү буенча үзгәрешләр кертелгән. Яңа кагыйдәләр белән бәйгенең интернет-битендә танышып була.
Икенче этапта балларның алыштырырга мөмкин булган бүләкләр өстәлгән: моноподлар, наушниклр, рюкзаклар "Адонис" фирмасыннан 3500 сумга мәктәп формасына сертификатлар һәм башка бүләкләр өстәлгән.
Беренче этап җиңүчеләре планшет компьютерлар, ә икенче этап җиңүчеләре смартфоннар белән бүләкләнәчәк. Бүләкләү тантанасы Казанда декабрьдә узачак.

Татарстан Республикасы Президенты вазыйфаларын вакытлыча башкаручы Рөстәм Миңнеханов урып-җыю кампаниясенең барышын контрольдә тотып, республика басуларын вертолетта карап чыга. 30 июльдә ул Арча районында да булып, игеннәрнең торышын әйбәт дип бәяләде, аларны югалтуларсыз җыйнап алу буенча киңәшләрен бирде.
Татарстан — күп икътисадый күрсәткечләр буенча, шул исәптән авыл хуҗалыгында да лидер төбәк. Җирле авыл хуҗалыгы җитештерүчеләре үз продукцияләре белән бөтен республиканы туендыра алалар.
— Авыл хуҗалыгы районы булган Арча районы өчен республика президент программалары бу тармакны үстерүгә зур этәргеч булды, — ди район башкарма комитеты җитәкчесе Илшат Нуриев. — 2014 елда 40х60 программасы буенча техника алу өчен республика бюджетыннан 45 млн. 754 мең сум ярдәм күрсәтелгән булса, быел алты айда гына да 26 млн. 596 мең сум акча бирелде. Быел хуҗалыкларга алты яңа трактор, алты комбайн, унлап туфрак эшкәртү техникасы, биш машина, бер бәрәңге алу комбайны кайтты. Техника паркының шактый тузуын исәпкә алсак, аны яңартуга саллы өлеш бу.

Сезне чын күңелдән һөнәри бәйрәм — Төзүче көне белән котлыйм һәм армый–талмый башкарган иҗади хезмәтегез өчен рәхмәт сүзләре җиткерәм!
Төзүче хезмәте киләчәккә юнәлтелгән, ул — территорияләрне үстерү, безнең кешеләрнең тормышын яхшырту. Бүген төзелеш мәйданчыкларында актив эш алып барыла, объектның күләменә генә түгел, сыйфатына да зур игътибар бирелә. Билгеле, боларның барысы артында да кешеләр тора. Сез киләчәктә дә райондашларыгызны үзегезнең хезмәт нәтиҗәләре белән куандырырсыз, нык һәм матур итеп төзерсез, туган як икътисадын ныгыту өчен барысын да эшләрсез, дип ышанам.
Хөрмәтле төзүчеләр!
Сезгә нык сәламәтлек, уңышлар, барлык планнарыгызның тормышка ашуын телим! Авыр, әмма бик кирәкле хезмәтегез сезгә шатлык һәм муллык алып килсен, сезнең һәр иҗади эшегез райондашларыбызның күп буыннарына шатлык бүләк итсен.
Арча муниципаль район җитәкчесе И. Г. Нуриев

5 августта район башкарма комитеты җитәкчесе Илшат Нуриев Арча шәһәренең көньяк микрорайонында яшәүчеләр белән очрашты.
Очрашуны шәһәр башкарма комитеты җитәкчесе Рафил Исмәгыйлев ачты һәм алып барды.
Район җитәкчесе Илшат Нуриев үзенең чыгышында районда барган матур үзгәрешләр, киләчәккә планнар турында сөйләде.
— Республиканың районга ярдәме бик зур, — диде ул. — Быел гына да 1 млрд. сумга якын акчалата ярдәм керде, төзелешләр, төзекләндерү эшләре киң колач белән алып барыла. Өченче мәктәпнең яңа бинасы ачылу алдында. Район хастаханәсе зур үзгәрешләр кичерә. Бөтен эш халыкның киләчәк тормышын яхшырту өчен башкарыла.

Район ветеринария берләшмәсе җитәкчесе Ринат Фәйзрахманов кызыклы саннар бирде.
— Шәхси хуҗалыкларда күпме терлек булуы турында иң төгәл исәп бездә, — диде ул. — Ни өченме? Безнең участок ветеринария табиблары һәр хуҗалыкта була, чөнки себер түләмәсенә каршы вакцина ясау мәҗбүри. Аны һәр терлеккә бушлай ясыйбыз. Менә шул вакытта алар терлекне дә санап бара инде.
Ветеринарлар исәбе буенча районда шәхси хуҗалыкларда 12350 мөгезле эре терлек, шул исәптән 4843 сыер, 666 тана, 283 ат, 7006 кәҗә һәм сарык бар.
Иң күп сыерны Хәсәншәех һәм Шушмабаш авылларында асрыйлар, аларда сөтлебикәләр — 149ар. Иске Кишеттә — 139, Иске Ашытта — 126, Шекәдә — 119, Апазда — 111, Кәчедә — 105, Пөшәңгәрдә — 104.
Югары Масра, Тылаңгыр, Казанкада сыерлар “Кызыл китап”ка кертерлек — 2–3 баш кына калган.

Икътисади кризиска карамастан, республика президент программалары буенча 2015 елда да мәктәпләрне ныклап төзекләндерү, яңа мәктәпкәчә балалар учреждениеләре төзү дәвам итә. Бу юнәлештә безнең районда да күләмле эш алып барыла. Бүгенге көндә Арчаның өченче мәктәбе һәм Арча станциясендәге 11нче балалар бакчасында эш төгәлләнү алдында тора.
Бөтен урамның күрке булып торган искиткеч матур бинага әверелде өченче мәктәп. Соңгы елларда ул башлангыч мәктәп булып торды. Хәзер шуңа өч катлы янкорма өстәлде.
– Беренче катында 40 балага исәпләнгән (ике төркем) балалар бакчасы, ашханә, кухня, икенче катында медицина, процедура кабинетлары, китапханә, душ кабиналары, спорт, актлар заллары, җитәкчеләр өчен кабинетлар, өченче катында филология кабинетлары булачак, – диде ”Арча КСМ”ы ширкәтенең төзелеш буенча прорабы Айрат Хәбиров.

3 августта Курса Почмакта яшәүче Ания Фәхретдиновага 90 яшь тулды. Ания ханымны олуг юбилее белән котларга район социаль яклау идарәсе җитәкчесе Илдус Әһлиев килде. Илдус Котдус улы гомеренең 43 елын балаларга белем бирүгә багышлаган мөхтәрәм әбекәйгә РФ Президенты В.Путинның котлау хатын чәчкәләр, бүләкләр тапшырды.
Үзен котларга килүчеләрне элеккеге мөгаллимә ханым уртанчы улы Рәис белән капка төбендә каршы алды. Ишегалдына үткәндә уң якта чәчәк диңгезе. Әлеге гүзәллек аеруча ямь биреп тора. “Чәчәкләрне киленем үстерә, мин чүпләрен утыйм, шланга тотып су си- бәм”, — дип бераз горурлану, куану белән әйтә Ания әби. Әллә шаярта, әллә... Белмәссең. Ул арада килене Гөлсинә апа да чыкты. Рәис абый белән Гөлсинә апа атна саен, кайчак атна уртасында да Казаннан әниләренең хәлен белергә кайта, шул арада бакча эшләрен дә карап китәләр икән.

Авыл кешесе өчен моннан да зуррак шатлык тагын бар микән. Юлсызлыкның бөтен газабын күргән кеше генә аңлый аны. Дөрес, моңарчы да бу авылга күтәртелгән яхшы юл салганнар иде инде. Шушы көннәрдә «Татавтодор»ның Арча филиалы авылга керүче юлга (барысы 2,7 км) асфальт түшәде. Хәзер Яңа Иябаш халкы яңа асфальт юлның игелеген күрә. Моның өчен алар республика, район җитәкчеләренә һәм төзүчеләргә рәхмәтле.

Арча районы хастаханәсенә Испаниядән лифт кайтачак
Район үзәк хастаханәсе яныннан узучылар аның тышкы кыяфәтенең заманча рәвешкә керүенә игътибар итәдер.
Эчке күренеше тагын да шаккатырлык. Биредәге ремонт эшләре инде төгәлләнеп килә. Тиздән авыруларны икенче катка күтәрү өчен куелачак лифт кайтырга тиеш. Ул махсус заказ белән Испаниядә эшләнгән. Яңартылган хастаханәгә кергәч, бу Арчаныкы түгел, ялгыш эләктем ахры, дип кире борылып чыгып китмәгез тагын!Палаталар,реанимация, операция ясау бүлмәләре, коридорлар, гомумән, бар да баштанаяк үзгәргән монда. Кайчаннан бирле хастаханәдә җылы су юклыгына зарлана идек. Хәзер һәр палатада булачак ул, барысына да юынгычлар куелган. Баш табиб Тәлгать Баһаветдинов әйтүенчә, бина гына түгел, хастаханәнең җиһазлары да яңарачак. Ремонтланган корпус янында калган бүлекләр урнашкан бина хәзер бик боегып тора кебек. Баш табиб киләчәктә анысына да төзекләндерү үткәреләчәге турында белдерде.