ЯҢАЛЫКЛАР
Кичә полиция хезмәткәрләре һөнәри бәйрәмнәрен билгеләп үтте. Искиткеч авыр, шул ук вакытта җаваплы бу хезмәтне башкаручылар, гадәттә, рәхмәт сүзләрен сирәк ишетә. Ә чынлыкта нәкъ менә алар тынычлыгыбызны саклый, куркынычсызлыгыбызны тәэмин итә. Бәйрәмнәре уңаеннан газетабызның бер битен Россия Эчке эшләр министрлыгының Арча районы буенча бүлегенә багышлыйбыз.
Полиция хезмәткәрләрен котлау өчен сүзне бүлек начальнигы, полиция полковнигы Айдар Баһавиевка бирдек.
– Халык ярдәм сорап иң беренче булып полиция хезмәткәрләренә мөрәҗәгать итә. Җәмәгатьчелек куркынычсызлыгын һәм хокук тәртибен тәэмин итү шәхси сос- тавның оператив һәм профессиональ эш итүеннән тора.
Районыбызның Шәрәфле гражданы, “Сервис Агро” ширкәте генераль директоры Габделхәй Йосыф улы Кәримов иң игелекле инвесторларның берсе булып чыкты. 2004 елның апрелендә элекке Мичурин исемендәге, “Тукай–Кырлай” хуҗалыклары базасында “Кырлай” агрофирмасы төзелде. Шуннан соң бик күп инвестицияләр кертелде, яңа комбайннар, тракторлар, башка авыл хуҗалыгы техникасы алынды. Игенчелек өлкәсендә хуҗалык республикада әйдәп баручыларның берсе. Соңгы елларда ул бәрәңге игү буенча да дан тота.
— “Кырлай” ширкәтендә бәрәңге 800 гектар сугарулы мәйданда игелә, — ди яшелчәчелек буенча агроном Алмаз Сабиров. — Моның өчен 5 буа төзелде, 23 су сиптерү машинасы бар.Буаларда 1500 кубометр су җыйнала.
5 ноябрьдә Арча муниципаль район башлыгы урынбасары Любовь Осина Сөрде авылында яшәүче Бөек Ватан сугышы ветераны Гозәер Мәгъсүмовны 90 яшьлек юбилее белән котлады.
Аңа Россия Федерация- се Президенты Владимир Путинның, район башлыгы Илшат Нуриевның Рәхмәт хатларын, бүләк тапшырды.
Гозәер Мәгъсүмов Сөрде авылында туган, гаиләдә биш бала булалар. Калганнары исән түгел.
Авылда башлангыч мәктәпне тәмамлагач колхозда төрле эшләргә йөри башлый. Башкача уку мөмкинлеге булмый. 1944 елда 18 яшь тулгач армиягә алалар.Сугышларда катнашмаса да, солдат хезмәтенең авырлыкларын күп татый. Укыганнан соң аларны хәрби складлар сакларга җибәрәләр. 6 ел хезмәт итә.
Арча педагогика көллияте бинасы — Казан арты милли кадрлар әзерләү II Халыкара фәнни-практик конференция кунакларын кабул итте.
86 еллык тарихка ия уку йорты элек-электән чын милли кадрлар әзерләп чыгарган һәм шул дәрәҗәсенә бүген дә тугры калып көн итә. 2013 елда ул лаеклы рәвештә милли кадрлар әзерләү статусын ала. “Бу статус безгә яңа мөмкинлекләр ачты, көллият каршында гимназия сыйныфлары эшли башлады”, — ди директор Гөлнара Гарипова. “Рухи тәрбия контекстында милли-мәдәни компонент” темасына багышланган конференция көллияткә Габдулла Тукай исеме бирелүгә 70 ел тулуга багышланган иде. Тукай исеме көллияткә 1946 елда, шагыйрьнең тууына 60 ел тулган уңайга бирелгән, ләкин ниндидер сәбәпләр белән документлар уку йортына кайтып җитми.
“Ел укытучысы – 2016” район бәйгесенең зона ярышлары булып узды. Арчаның икенче, Наласа, Курса–Почмак, Түбән Мәтәскә, Шушмабаш, Яңа Кенәр мәктәпләрендә, бишенче гимназиядә шул зонага кергән мәктәпләр укытучылары осталыкларын исбатлады.
Шушмабаш мәктәбендә Апаз, Пөшәңгәр, Хәсәншәех, Носы, Яңа Кенәр мәктәпләре укытучылары дәрес бирде, осталык дәресләре күрсәтте. Аларның хезмәтен мәгариф идарәсе хезмәткәрләре, педагогика көллияте укытучысы, ветеран укытучыдан торган дәрәҗәле жюри бәяләде.
– Соңгы елларда бәйгенең беренче этабында видео- дәресләр карап, укытучыны бәяли, ә дәресне финалга чык-кан укытучы бирә иде. Быел элеккеге алымга кире кайтып, урыннарга барып дәресләр карадык. Зоналарга бүленеп. Барлык мәктәпләрдән диярлек (кайберләреннән ике, хәтта өч кеше) катнаштылар. Дәресләр 30 минут барды, – ди мәгариф идарәсе җитәкчесе урынбасары Зөлфия Кәлимуллина.
Газета укучыларыбыз “Ир белән хатын арасында милек бүлү тәртибе нинди?” дигән сорау белән мөрәҗәгать итте.
Бу сорауга юрист Егоров Андрей Александрович җавап бирә:
—Россия Федерациясе Гаилә кодексының 34нче маддәсе нигезендә, ир белән хатын өйләнешкәч булдырылган милек уртак милеп булып санала. Шул ук вакытта хезмәт, интеллектуаль һәм эшмәкәрлек эшчәнлеге керемнәре гомуми милек булып санала. Пенсия, пособие һәм махсус максатчан билгеләнештә булмаган башка акчалата түләүләр уртак санала. Бергә сатып алган барлык күчмә һәм күчемсез әйберләр шулай ук тигез итеп бүленә. Кыйммәтле кәгазьләр, пайлар һәм кертемнәрне һичшиксез бүләргә кирәк. Шулай ук теләсә нинди милек, кем исеменә рәсмиләштерелүенә карамастан, бүленергә тиеш. Әйтик, күбрәк табыш алучы ир яки хатынның берсе, мәсәлән ир фатир сатып ала, әмма аны хатыны исеменә рәсмиләштерә, бу очракта ир сатып алган фатирдан үз өлешен таләп итәргә хокуклы.
2015 елның 23 ноябрендәге 320–ФЗ номерлы Федераль закон нигезендә, Россия Федерациясе Салым кодексының 409нчы маддәсенең салымнар түләү срокларына кагылган өлешенә үзгәрешләр кертелде.
Үзгәрешләр нигезендә, физик затлар милкенә салымны, җир салымын, шулай ук транспорт салымын салым түләүчеләр елның салым чорыннан соңгы елның 1 декабренә кадәр түләргә тиешләр. Ягъни, 2015 елның салым чоры өчен салым 2016 елның 1 декабренә кадәр түләнергә тиеш. Исегезгә төшерәбез, элек физик затлар өчен салым түләү срогы узган салым чорыннан соңгы елның 1 октябреннән дә соңга калмыйча дип билгеләнгән иде.
16 ноябрьдә сәгать 10да “Казан арты” тарих–этнография музеенда спорт өлкәсендә зур уңышларга ирешкән һәм шулай ук иҗат белән шөгыльләнергә дә вакыт тапкан Фәрит Минхәиров белән үзенчәлекле очрашу кичәсе була.
15 ноябрьдә 11.30 сәгатьтә “Бердәм Россия” партиясенең Арча җирле бүлекчәсе җәмәгатьчелек кабул итү бүлмәсендә (Арча шәһәре, Банк урамы, 6в йорт, социаль яклау бүлеге, 11нче бүлмә) Татарстан Республикасы Дәүләт Советы депутаты Рауил Рәхмәтуллин гражданнарны кабул итә. Алдан язылу өчен телефон: 3–18–08, 3–28–80.
Намуслы хезмәте өчен һәм 60 яшь тулу уңаеннан “Энергосервис” ширкәте электромонтеры Исмәгыйлов Рәдиф Самат улы муниципаль район башлыгының Рәхмәт хаты белән бүләкләнде.