ЯҢАЛЫКЛАР

12 июльдә өченче чакырылыш Арча район Советының чираттагы җиденче утырышы булды. Аны муниципаль район башлыгы — район Советы рәисе Илшат Нуриев алып барды.
Утырышның беренче көн тәртибендәге “2016 елның беренче яртыеллыгында Арча муниципаль районының бюджет үтәлеше турында”гы мәсьәлә буенча финанс–бюджет палатасы җитәкчесе Фәнис Исмәгыйлев чыгыш ясады.
Район бюджетының керем өлешен формалаштыруның төп чыганагы булып физик затларның керемнәренә салым тора. 2016 елның беренче яртыеллыгында район бюджетында әлеге салымның өлеше 75,2 процент тәшкил итте. 2015 елга карата үсеш — 7,5 процент. Еллык план 43,5 процентка үтәлде.
Физик затлар кеременә салымны төп түләүчеләр: “АСПК” акционерлык җәмгыяте”, “Ак барс” агрокомплексы”, “Газпром Трансгаз Казань”, “Татавтодор”, “Таттелеком” ширкәтләре, “Россия тимер юллары”, “Сетевая компания”, “Арскнефтепродукт” акционерлык җәмгыятьләре, “Мәрҗани” ширкәте.

“Россия Федерациясе гражданнарының сайлау хокуклары һәм референдумда катнашу хокукының төп гарантияләре турында”гы Федераль законның 50 маддәсе, “Россия Федерациясе Федераль Җыены Дәүләт Думасына депутатлар сайлау” турындагы Федераль законның 64 маддәсе нигезендә, “Арча хәбәрләре” (“Арский вестник”) газетасы редакциясе Россия Федерациясе Федераль Җыены җиденче чакырылыш Дәүләт Думасына депутатлар сайлау буенча теркәлү үткән кандидатларга һәм кандидатлар исемлеге теркәткән сәяси партияләргә сайлау алды агитациясе өчен биреләчәк түләүсез һәм түләүле басма мәйдан турында хәбәр итә.

Районның социаль–икътисадый үсешенә керткән өлеше өчен һәм 70 яшь тулу уңаеннан хезмәт ветераны Гарипов Роберт Зариф улы һәм авыл хуҗалыгы өлкәсендә озак еллар намуслы хезмәте һәм районның социаль–икътисадый үсешенә керткән өлеше өчен район авыл хуҗалыгы һәм азык–төлек идарәсенең җитештерү–маркетинг бүлеге җитәкчесе Сәгыйть- җанов Миннәхмәт Рәис улы Арча район Советының Мактау грамоталары белән бүләкләнделәр.

Һәр буынның үз проблемасы. Арча яшьләрен дә читләтеп үтми андый мәсьәләләр. Ничә еллар инде яшьләрдән: “Кичен кайдадыр җыелышырга, бергәләп сөйләшеп утырырга урын юк”, —кебек зарлар ишетергә туры килә.

Элек, ичмаса, рәхәтләнеп кино карый, һинд киноларын караганда елап шешенеп беткән чаклар була иде, дип урта һәм өлкән буын апалары бүген дә еш искә ала. Узган гасырда карап үскән кинофильмнар турында сүз чыккач, күп- ләрнең сүзе үзеннән-үзе истәлекләргә барып тоташа. Арчалыларга шундый бәхетле мизгелләр бүләк иткән Тәнзилә Закированы да телгә алалар. Үзе куйган киноларны карап үскән буын белән очрашкач, Тәнзилә апа үзе дә яшьлегенә кайткандай, шул елларны сагынып сөйләшә башлый. Заманында Тәнзилә апа кешегә бәхетле сәгатьләр бүләк итү өчен кино тасмаларын Казаннан җилкәсенә сумка белән аллы-артлы асып, поездда я юлаучы машиналарда ташый торган була. Аның кебек хирыс, кино кую хезмәтенә бөтен барлыгы белән бирелгән кешене көндез чыра яндырып эзләсәң дә табып булырмы икән хәзер? 

Урамнарда, жәмәгать урыннарында тәртип саклау, куркынычсызлык тәэмин итү, җинаятьләрне булдырмау һәм ачыклау максатында һәр шимбә опертөркемнәр, алар белән бергә ирекле халык дружиначылары да (Арчада 4 отряд, һәр шимбә 2 кеше) рейдларга, офицер патрульләренә чыга.

Шундый рейдларның берсендә участок инспекторы Руслан Зарипов, җәмәгать тәртибен саклау буенча өлкән инспектор Рәмзия Тимергалиева, салкын корал белән эш итү бүлеге инспекторы Фәнил Хисмәтуллин, полиция машинасын йөртүче Илвир Мифтахов белән ирекле халык дружиначылары “Арча элеваторы” ширкәтеннән Ришат Әхмәдиев, “АСПК” җәмгыятеннән Марат Ибраһимов катнашты.

Арчада бер көндә (2 июльдә) 4 урында бер үк кешеләр тарафыннан урлау очраклары теркәлгән. 16–17 яшьлек А. белән Б. Пушкин урамында, бер йорт каршында торган “Шевроле Авео” машинасы бардачогыннан 11000 сум акча урлыйлар. Шул ук көнне Вахитов урамында бер йорт каршындагы “Рено Симбол” машинасы салоныннан банк карталары, 3000 сум акча белән акча янчыгы, машина документлары юкка чыга. Озакламый М.Горький урамындагы 23нче йорт подъездыннан 3500 сумлык “Стелс” маркалы велосипедны урлаулары турында хәбәр килә. Карак- лар моның белән генә дә туктап калмый. “Газель” машинасыннан автомобиль документларын, паспортны, акчаларны, кредит карталарын урлап китәләр.

Арчадагы “Алтын Ай” кибете янында торган “Свияга” суыткычын урлап китәләр. Хуҗасына 4000 сумлык зыян килә. Әмма караклар ерак китә алмый.

“Үз мәктәбеңә булыш” акциясе кысаларында Түбән Мәтәскә мәктәбенең туризм белән шөгыльләнүче балаларын шәхси эшмәкәрләр Айдар Сабиров 2000 сум, Динар Төхвәтуллин 2600 сумлык спорт инвентарьлары бүләк итеп сөендерде. “Үз җирлегебездәге яшьләрнең спорттагы уңышлары белән кызыксынуларына теләктәшлек белдергән эшмәкәрләргә рәхмәт”, — ди мәктәп директоры Алмаз Ибраһимов. 

ЗАГС хезмәткәрләренең озак еллар матур гомер кичергән парларны кунакка чакырып, хөрмәт күрсәтүләре бик күркәм йола. Программаны да алар, юбилярларның үзләре белән сөйләшеп, җылы һәм эчтәлекле итеп төзи. Яңа гына булып үткән бәйрәмдә ЗАГС мөдире Фәридә Бәхтиярова:

— 50 ел бергә гомер кичергән Казан егете Ринат Алмаев белән Сикертән авылы кызы Фирая Батыршинаны Арча педагогика училищесы кавыштыра. Аларның балалары, хәтта киленнәре дә укытучы. Бу гаиләнең мактаулы, дәрәҗәле исемнәрен санап бетерерлек түгел, иң зур даннары — аларны халык хөрмәт итә, эшләгән хезмәтләре өчен рәхмәт укый.

Бүген биредә нәкъ менә халык хөрмәт иткән гаиләләр җыелган. Алар: Арчадан Фирая Батыршина һәм Ринат Алмаев, Яңа Кишеттән Рауза һәм Радик Кәримовлар, Яңасаладан Саҗидә һәм Николай Бламыковлар, Сөрдедән Гөлфия һәм Фәрит Салиховлар. Тантанада район башкарма комитеты җитәкчесе урынбасары Рамил Гарифҗанов катнашты. Аларны котларга балалары, якыннары, авыл жирлекләре башлыклары килгән. Күңел түреннән чыккан иң җылы хисләрне дулкынланмыйча әйтеп тә һәм кабул итеп тә булмый. Күзләрдә менә–менә чайкалып түгелергә торган яшьләр... Бу ана белән бала, ата белән баланы бәйләп торган җепләрнең җиңел генә бер тетрәнүе. 

Татарстанда Болгар ислам академиясе төзелә һәм Казан Мәрьям Ана иконасы соборы торгызыла башлый. Проектларга республиканың “Яңарыш” фонды күзәтчелек итә.

Төрле милләт һәм дин вәкилләре озак гасырлар дәвамында үзара дус–тату яшәгән Татарстан төбәгендә мөселманнар һәм христианнар өчен әһәмиятле бу вакыйгалар тарихка кереп калачак.

Мондый проектлар бездә гадәттә бөтен ил белән тормышка ашырыла. Тамчылардан күл җыела, диләр. Республика күләмендә бу изге эшкә үз өлешен кертергә теләүчеләр көннән–көн арта бара.

Россиядә 200 һәм 2000 сумлык кәгазь акчалар чыга башлаячак. Россия Үзәк банкы әлеге уңайдан конкурс игълан итте. Тавыш бирүдә катнашучыларга купюраларда төшереләчәк шәһәрләрне, алардагы истәлекле урыннарны күрсәтергә кирәк. Яңа акчаларда Татарстан башкаласы, аның тарихи һәйкәлләре дә урын алырга мөмкин. Бу республика халкының активлыгына бәйле.Бүгенге көндә Казан Кремле 5 меңнән артык тавыш җыярга өлгергән инде.

Тавыш бирү Твоя-Россия.рф сайтында бара. Бәйгедә Facebook, “В контакте” яки “Одноклассники” социаль челтәрләрендәге үз битегезне кулланып яки мобиль телефон аша теркәлү узып тавыш бирергә мөмкин.

Бәйге җиңүчеләре 5 сентябрь – 5 октябрь аралыгында узачак тавыш бирүнең соңгы этабында билгеләнәчәк.

Әйдәгез, Казаныбыз- ның данын бергәләп яклыйк.